Agentliyin rəsmi saytından "Onlayn müraciət" bölməsi vasitəsi ilə, həmçinin saytda qeyd olunan "Əlaqə" bölməsindəki əlaqə vasitələri və sosial şəbəkə hesabları vasitəsi ilə müraciət edə bilərsiniz.
Azərbaycan Dövlət Su Ehtiyatları Agentliyinin tabeliyində hansı qurumlar var ?
ADSEA-nın yanında fəaliyyət göstərir:
• "Suların İstifadəsinə və Mühafizəsinə Dövlət Nəzarəti Xidməti"
ADSEA-nın tabeliyində fəaliyyət göstərir:
• "İri Şəhərlərin Birləşmiş Su Təchizatı Xidməti" • "Regional Su Meliorasiya Xidməti" • "Tikilməkdə Olan Obyektlərin Müdriyyəti" • "Su və Meliorasiya Elmi Tədqiqat İnstitutu" • "Su və Meliorasiya Kompleksinin Layihələndirilməsi İnstitutu"
Azərbaycan Dövlət Su Ehtiyatları Agentliyinə işə necə qəbul ola bilərəm ?
Azərbaycan Dövlət Su Ehtiyatları Agentliyi dövlət qulluğuna aid struktur bölmələrində işə qəbul “Dövlət qulluğu haqqında” Azərbaycan Respublikasının Qanunu ilə tənzimlənir. Belə ki, dövlət qulluğu iddiasında olan şəxslər Azərbaycan Respublikasının Dövlət İmtahan Mərkəzi tərəfindən təşkil olunan test imtahanında iştirak edərək müvafiq sertifikat əldə edir, sözügedən Mərkəzin saytında Agentliyin müsabiqə üzrə müsahibəyə çıxarılmış vakant vəzifələrindən təhsilinə və sertifikatına uyğun olanı seçərək müsahibədə iştirak edir. Müsahibədə uğurla iştirak edən namizədin sənədləri vakant vəzifəyə təyin edilməsi məqsədi ilə Azərbaycan Dövlət Su Ehtiyatları Agentliyinə təqdim olunur. Həmçinin dövlət qulluğunda 5 il iş stajı olan şəxslər dövlət qulluğu vəzifəsinə təyin olunmaq üçün qanunvericiliyə uyğun olaraq ümumi müsahibədə iştirak edə bilərlər.
Vətəndaş qəbulu nə zamandır ?
Azərbaycan Dövlət Su Ehtiyatları Agentliyinin vəzifəli şəxslərinin "Vətəndaş qəbulu" üzrə qəbul günləri və qəbul saatı saytda "Qəbul günləri" bölməsindəki cədvəldən əldə edə bilərsiniz.
Su təchizatı və tullantı sularının axıdılması xidmətlərinin təşkili hansı Qanun və Qaydalarla tənzimlənir ?
- “Su təchizatı və tullantı suları haqqında” AZƏRBAYCAN RESPUBLİKASININ QANUNU
- “Sudan istifadə Qaydaları”nın təsdiq edilməsi haqqında AZƏRBAYCAN RESPUBLİKASI NAZİRLƏR KABİNETİNİN QƏRARI
- “Tikinti obyektlərinin su təchizatı və tullantı sularının axıdılması sisteminə qoşulması Qaydası”nın təsdiq edilməsi haqqında AZƏRBAYCAN RESPUBLİKASI NAZİRLƏR KABİNETİNİN QƏRARI
- Tikinti obyektlərinin su təchizatı və tullantı sularının axıdılması sistemlərinə qoşulma xidmətinə görə ödənişin məbləğlərinin tənzimlənməsi barədə AZƏRBAYCAN RESPUBLİKASININ TARİF (QİYMƏT) ŞURASININ QƏRARI
Su təchizatı və tullantı sularının axıdılması sisteminə qoşulmaq üçün hara müraciət etməliyəm ?
ASAN Xidmət və ASAN Kommunal Mərkəzlərinə, Kiçik və orta biznes evlərinə (KOB) müraciət edərək və ya Elektron su (e-su.az) portalına və Elektron hökumət portalına daxil olaraq “Texniki şərtin verilməsi” xidmətindən istifadə edə bilərsiniz.
Yeni mülkiyətçiyəm, həmin ünvana məxsus abonent kodunun öz adıma rəsmiləşdirilməsi üçün nə etməliyəm ?
Su ilə təchiz olunmuş obyektin mülkiyyətçisi (istifadəçisi) dəyişdirildikdə, əvvəlki istehlakçı obyektin mülkiyyətçisi (istifadəçisi) dəyişdirildiyi günədək sudan istifadəyə görə olan borcunu ödəməli, STKM-dən borcunun olmaması barədə arayış almalı və həmin arayışı yeni istehlakçıya təqdim etməlidir.
Yeni mülkiyyətçi (istifadəçi) yeni müqavilənin bağlanılması üçün STKM-ə 10 (on) iş günü müddətində yazılı müraciət etməlidir. Yazılı müraciət daxil olduğu gündən 3 (üç) iş günü müddətində yeni mülkiyyətçi (istifadəçi) ilə STKM arasında müqavilə bağlanılmalıdır.
Mülkiyyətçi dəyişdiyi hallarda yeni mülkiyyəçi həmin ünvana məxsus kodun öz adına keçirilməsi üçün yerli Su təchizatı və kanalizasiya müəssisələrinə, ASAN Xidmət və ASAN Kommunal Mərkəzlərinə müraciət edə və ya Elektron su (e-su.az) portalına və Elektron hökumət portalına daxil olaraq “Abonent məlumatlarının dəyişdirilməsi” xidmətindən yararlana bilər.
Əhali abonentləri üçün zəruri olan sənədlərin siyahısı:
• Abonentin şəxsiyyət vəsiqəsi • Mülkiyyəti və ya əşya hüququnu təsdiq edən sənəd (çıxarış, sərəncam, bələdiyyə qərarı, order, notarial qaydada təsdiq olunmuş alqı-satqı, icarə müqaviləsi, bağışlama, vərəsəlik haqqında şəhadətnamə və s.); • Abonent kodu • Sayğacsız abobnentlırdə qeydiyyatda olan şəxslərin sayı barədə sənəd
Qeyri əhali abonentləri üçün
• VÖEN (olduğu halda) və şəxsiyyət vəsiqəsi (hüquqi şəxs yaratmadan sahibkarlıq fəaliyyəti ilə məşğul olan fiziki şəxs olduğu halda); • Mülkiyyəti və ya əşya hüququnu təsdiq edən sənəd (çıxarış, sərəncam, bələdiyyə qərarı, order, notarial qaydada təsdiq olunmuş alqı-satqı, icarə müqaviləsi və s.); • Hüquqi şəxsin təmsilçisinə (nümayəndəsinə) verilən müvafiq məktub, nümayəndənin şəxsiyyət vəsiqəsi və VÖEN (hüquqi şəxs olduğu halda);
Su təchizatı sisteminə qanunsuz qoşulma halı olduqda dəymiş ziyan hansı qaydada hesablanır ?
Su təchizatı sisteminə qanunsuz (özbaşına) qoşulma halları aşkar edildikdə və belə qoşulmanın tarixini müəyyən etmək mümkün olmadıqda, itirilmiş suyun həcmi Azərbaycan Respublikasının Nazirlər Kabinetinin 17 iyul 2014-cü il tarixli, 262 nömrəli qərarı ilə təsdiq edilmiş “Sudan istifadə Qaydaları”nın 4 nömrəli əlavəsinə uyğun olaraq ötən 1 (bir) il müddətinədək hesablanır.
Suölçən cihazların quraşdırılması ödənişlidirmi ?
İstehlakçıların suölçən cihazlarla təchiz edilməsi, onların quraşdırılması və dəyişdirilməsi fiziki şəxs (əhali qrupu üzrə) olan istehlakçılara münasibətdə Su təchizatı və kanalizasiya müəssisəsinin (STKM) vəsaiti hesabına (kommersiya fəaliyyəti ilə məşğul olan fiziki şəxslər istisna olmaqla), hüquqi şəxs (qeyri-əhali qrupu üzrə) olan istehlakçıya münasibətdə isə istehlakçının öz vəsaiti hesabına həyata keçirilir.
Suölçən cihazın sərfiyyat yükləmə kartı itirildikdə və ya zədələndikdə yenisi ilə əvəz olunması üçün ödəniş edilməlidirmi ?
Suölçən cihazın sərfiyyat yükləmə kartı itirildikdə və ya zədələndikdə kartın yenisi ilə əvəzlənməsi (dəyişdirilməsi) istehlakçının vəsaiti hesabına aparılır.
Suölçən cihazın istismar vəziyyətinin laboratoriya şəraitində yoxlanılması ödənişlidirmi ?
Suölçən cihazların növbəti dövlət yoxlaması onların texniki pasportlarında göstərilmiş müddətdə həyata keçirilir. Suölçən cihazın dövlət yoxlaması istehlakçının arzusu ilə və ya istehlakçının təqsiri səbəbindən həyata keçirildikdə istehlakçının, digər hallarda isə STKM-in vəsaiti hesabına həyata keçirilir.
Abonent koduma online şəkildə etdiyim ödənişi smart karta yükləmək üçün nə etməliyəm?
Şəxsiyyəti təsdiq edən sənəd, ödəniş qəbzi və smart kart ASAN Kommunal, ASAN Xidmət və ya aidiyyəti üzrə yerli Su təchizatı və kanalizasiya müəssisəsinə təqdim edilməlidir.
Mexaniki tipli sayğacın göstəricisi oxunmadıqda (abonent tərəfindən şərait yaradılmadıqda) və ya sayğac işləmədikdə sərf edilmiş suyun həcmi hansı qaydada hesablanır?
İstehlakçı STKM-in nümayəndəsinin suölçən cihaza baxmasına şərait yaratmadıqda, sərf edilmiş suyun həcmi istehlakçının əvvəlki 12 (on iki) aylıq dövrdə (istehlak dövrü 12 (on iki) aydan az olduqda, faktiki istehlak dövrü üzrə) istifadə etdiyi orta istehlak normasına əsasən hesablama yolu ilə müəyyənləşdirilir. Əvvəlki 12 (on iki) aylıq dövrdə istifadə edilmiş orta istehlak normasına əsasən aparılmış hesabatlara sonradan müəyyən olunmuş suölçən cihazın faktiki göstəricisinə uyğun olaraq düzəliş aparılır. Düzəliş nəticəsində istehlakçının artıq ödədiyi məbləğ növbəti hesabatlarda nəzərə alınır və ya istehlakçıya geri qaytarılır. Siz www.e-su.az saytına daxil olaraq “Əhali qrupu üzrə istehlakçıların sayğac göstəricilərini təqdim etməsi və hesab fakturaların formalaşdırılması” elektron xidmətimizdən istifadə etməklə mexaniki sayğacın faktiki göstəricisinə əsasən formalaşmış elektron bildiriş-faktura əldə edə bilərsiniz.
Suölçən cihaz yararsız vəziyyətə düşdükdə, yeni suölçən cihaz quraşdırılanadək istifadə olunan suyun həcmi, bundan əvvəlki 12 (on iki) ayda (istehlak dövrü 12 (on iki) aydan az olduqda, faktiki istehlak dövrü üzrə) sərf olunmuş suyun orta aylıq sərfi həcmində təyin edilir.
Bir ünvanda verilən suya və axıdılan tullantı sularına görə yaranmış borcla bağlı istehlakçıya məxsus borcu olmayan digər sahələrin su təchizatı dayandırıla bilərmi?
Bir ünvanda yaranmış borca görə istehlakçıya məxsus borcu olmayan digər mənzil və ya obyektin su təchizatı borc tam ödənilənədək dayandırıla bilər.
İstehlakçı ona təqdim edilmiş hesab üzrə gecikdirilmiş ödənişlərini (qalıq borclarını) hissə-hissə ödəyə bilərmi ?
İstehlakçı ona göndərilmiş (təqdim edilmiş) hesab üzrə gecikdirilmiş ödənişləri (qalıq borclarını) Su təchizatı və kanalizasiya müəssisəsi ilə (STKM) qarşılıqlı razılaşma əsasında hissə-hissə ödəyə bilər.
Suölçən cihaz olmadıqda əhali qrupu üzrə su təchizatı və tullantı sularının axıdılması xidmətlərinə görə hesabat hansı qaydada aparılır?
Əhali qrupuna aid olan istehlakçılara suölçən cihaz quraşdırılmadıqda, verilmiş suyun və axıdılmış tullantı sularının və buna görə ödənilməli olan vəsaitin həcmi istehlakçıya məxsus mənzildə (fərdi yaşayış evində) qeydiyyatda olan şəxslərin sayına uyğun olaraq müvafiq dövr üzrə aparılan hesablama yolu ilə müəyyənləşdirilir.
Suölçən cihaz olmadıqda istehlakçıya məxsus mənzildə və ya fərdi yaşayış evində ailə üzvlərinin sayında dəyişiklik olduqda nə etmək lazımdır ?
Qeydiyyatda olan şəxslərin sayında dəyişikliklər olduqda, istehlakçı bu faktı təsdiq edən sənədi ən geci 7 (yeddi) iş günü müddətində Su təchizatı və kanalizasiya müəssisəsinə (STKM) təqdim etməlidir. STKM hesablamanı sənəd təqdim edildiyi gündən sənəddə göstərilən məlumata uyğun aparmalıdır. Qeydiyyatda olan şəxslərin sayı barədə sənəd istehlakçı tərəfindən təqdim edilmədikdə su təchizatı və tullantı suları barədə hesabat ölkə üzrə ailə tərkibinin müəyyənləşdirilmiş orta statistik say tərkibinə uyğun olaraq aparılır.
